ရွှေမော်ဓောစေတီတော်ရင်ပြင် အနောက်မုခ်အနီး ဓာတ်လှေကားပေါက်အနီးတွင် ဘုံ ပြဿာဒ်တို့ဖြင့် မဏိကုဏ္ဍလဘိုးဘိုးကြီးနတ်နန်း တည်ရှိလေသည်။ ထိုနတ်နန်းတွင် မဏိ ကုဏ္ဍလဘိုးဘိုးကြီးနှင့်အတူ မဟာဘောဂဘိုးဘိုးကြီး၊ အဘဘိုးဘိုးအောင်၊ ရုက္ခဒေဝ (ရုပ်က္ခစိုး နတ်မင်းကြီး) သာသနာစောင့် သိကြားမင်း၊ ပြဒါးဝိဇ္ဇာ၊ သူရဿတီမယ်တော်ရုပ်ထုများလည်း တည်ထားကိုးကွယ်ထားသည်။ အဓိဌာန်ပူဇော်ခြင်းဖြင့် မိမိတို့ကိုယ်တွင်းကိုယ်ပ ကျရောက်ဆဲ ကျရောက်အံ့သော ဘေးဥပါဒ်အန္တရာယ် ရန်စွယ်ဟူသမျှကို အကာအကွာပေးသေည်ဟု ယုံကြည် ကြသည်။ ယုံကြည်မှုကို ရှေ့ရှု၍ အောင်သပြေပန်း လှူဒါန်းခြင်း၊ အမွှေးတိုင်၊ ဆီမီးတိုင်ပူဇော်ခြင်း၊  ရေခုနှစ်ခွက်ဖြင့် ရေသပ္ပါယ်ခြင်းများဖြင့် ပူဇော်ကြသည်။

ပထမလှူဒါန်းခြင်းမှာ စီးပွားရေးလုပ်ငန်းများ အောင်မြင်ရန် အနှောက်အယှက်မရှိရန်၊ စာမေးပွဲဖြေဆိုနိုင်ရန်၊ ရာထူးဌာနန္တရတည်တံ့ခိုင်မြဲရန် လှူဒါန်းပူဇော်ကြသည်။

ဒုတိယလှူဒါန်းခြင်းမှာ သိုက်ဆက်ရှိသူများ၊ သိုက်အနှောက်အယှက်ကြောင့် ကျန်းမာရေး မကောင်းခြင်း၊ ပပျောက်စေရန်၊ သိုက်ဆက်ဖြတ်ရန်၊ သိုက်ပွဲဖြင့် သိုက်ချုပ်ဘိုးဘိုးကြီးက တားမြစ်ပေးရန်၊ အမျိုးသမီးများ သားသမီးရတနာ မထွန်းကားသော် သားကောင်းရတနာများ ထွန်းကားရန် ဆုတောင်းပြီး ဘိုးဘိုးကြီးထံ သိုက်ပွဲလှူဒါန်းကြသည်။ ပြီးအောင်စေ ပိုင်စေနိုင်စေ ပြည့်ဝစေဟု အောင်စည်အောင်မောင်း တီး၍ အမျှအတန်းပေးဝေလှူဒါန်းကြသည်။